Innheimta á vegum ríkisins er rugl

Það er auðvitað út í hött að ríkið innheimti sjálfkrafa sóknargjald fyrir alla trúarsöfnuði Íslendinga.  Það er enn þá meira út í hött, og raunar ótrúleg valdníðsla af hendi hins opinbera að þeir sem ekki tilheyra trúfélögum skuli ekki borga tilsvarandi lægri upphæð til hins opinbera.

Að flokkur eins og Sjálfstæðisflokkurinn sem í orði segist fylgjandi frelsi einstaklingsins, skuli láta hjá líða að afnema ofbeldi hins opinbera eins og þetta, segir meira en margt annað, um hvernig forystumenn flokksins hugsa í raun.

Auðvitað má hugsa sér að hið opinbera taki að sér að innheimta sóknargjöld fyrir trúfélög gegn hóflegu gjaldi.

Það ætti þá að fara fram með þeim hætti að einstaklingum ætti að vera gert kleyft að haka við á skattskýrslu, hvort þeir vilji að dregið sé af þeim sóknargjald eður ei.  Síðan hökuðu þeir við hvaða trúfélag þeir vildi að fengið gjaldið.

Síðan má auðvitað velta því fyrir sér hvort rétt væri að opna þessa innheimtuleið fyrir öðrum samtökum, s.s. íþróttafélögum, kvenfélögum, góðgerðarfélögum o.sv.frv.

 

 

Sóknargjald hækkar á hvern einstakling

Athugasemdir

[Hjalti Rúnar Ómarsson, 9.9.2014 kl. 21:16]

Hjartanlega sammála þér, nema hvað að í raun er sóknargjald ekki innheimt af almenningi. Það er ekkert sérstakt sóknargjald innheimt, heldur er þetta bara til sem framlag úr ríkissjóði.

[G. Tómas Gunnarsson, 9.9.2014 kl. 21:21]

Ég held að þetta sé rétt hjá þér, en samt sem áður er þetta tekið inn í álagningarprósentuna, óbeint, og flutt til trúfélaganna.

Og eftir því sem ég hef heyrt, nýtur Háskóli Íslands þess enn, að fá greitt samsvarandi upphæði fyrir hvern einstakling sem stendur utan trúfélaga.

Og eftir stendur sú hróplega mismunun að þeir sem standa utan trúfélaga, njóta þess ekki í lægri gjöldum

Allir flokkar sem telja sig standa fyrir val og frelsi einstaklinga ættu að berjast á móti slíku fyrirkomulagi, en því er ekki að heilsa á Íslandi.