Brrrrrrr

Nýja árið hefur byrjað bjart og fagurt hér í Toronto, en nokkuð kalt.

Á nýársdag snjóaði hér svo um munaði, jafnfallin mjöll setti svip sitt á Bjórá og næsta nágrenni, trén skreytt með mjallahvítum greinum og ákaflega fallegt um að litast.

Í morgun sýndi mælirinn hér að Bjórá hins vegar -15° og fannst mér óneitanlega nokkuð kalt, þó að vissulega væri fallegt ennþá, og varð reyndar enn fallegra þegar sólskinið bættist í myndina þegar líða tók á morgunin.

En við hér lítum bjartsýnumog björtum augum til ársins 2008, og höfum alla trú á því að það verði bjart og gott eins og þeir dagar sem eru búnir, það er bara að klæða af sér kuldann.

 

Athugasemdir

[Helgi Már Barðason, 2.1.2008 kl. 21:19]

Það er fátt sem jafnast á við fallegan vetrardag í Ontaríó. En mikið andsk ... er vindurinn kaldur þegar hann lætur á sér kræla!

[G. Tómas Gunnarsson, 2.1.2008 kl. 21:25]

Jamm... reyndar sagði útvarpið að kuldinn væri eins og u.þ.b. -22° með vindkælingunni.  Nú er bara að fara að leita að "föðurlandinu".  Ef að líkum lætur fáum við einhverja daga þar sem frostið fer niður fyrir  20 stigin í janúar eða febrúar. 

En eins og kerlingin sagði, það er ágætt að það sé vetur þegar það er vetur og sumar þegar það er sumar.

[Aðils (IP-tala skráð) 3.1.2008 kl. 22:31]

Hvernig er það ertu ekkert farinn að brúka nýju myndavélina og festa eitthvað af þessari köldu fegurð á flögu ?

Endilega sendu link á myndasíðu ef þú ert með...ef ekki þá mæli ég með fotki.com sem er auðveld í notkun og ódýr.

[G. Tómas Gunnarsson, 4.1.2008 kl. 04:27]

Ég hef lítið sem ekkert farið út með vélina, bara verið hérna inni og verið að venja mig við hana, stúdera spá og spegulera. 

Börnin eru heldur ekkert áfjáð í að fara út í frostið.

Líklegast verður lítið myndað í frostinu, en það á að fara að hlýna hérna um helgina, og verðu 10 til 12 stig í næstu vikur og það í plús.

Sveiflan nokkuð stór, því að hér voru 17 stig í mínus í morgun.