Grískt samkomulag, en hvað svo? Aukið atvinnuleysi og frekari niðurskurður?

Það er óneitanlega jákvætt að þessi niðurstaða hafi fengist. Það hefur að vísu ekki skort fréttir undanfarin ár að Grísk stjórnvöld ætli að grípa til róttækra ráðstafana í efnahagsmálum, en því miður hafa þær orðið til lítils.

Nú tekur eurosvæðið við boltanum og ræðir hvort að nógu langt sé gengið og hvort grikkir fái 130 milljarða euroa (sem margir eru farnir að segja að sé of lítið).  Stór spurning er hvað Seðlabanki eurosvæðisins ætlar að gera, en hann er talin eiga í það minnsta í kringum 40 milljarða euroa í Grískum skuldabréfum.  Við eigum einnig eftir að sjá til hvaða ráðstafana Evrópusambandið ætlar að grípa til að fylgja málum eftir.  Persónulega yrði ég ekki hissa þó að ein af þeim fyrstu væri að fresta fyrirhuguðum þingkosningum sem fyrirhugaðar eru í apríl. Ég leyfi mér að efast um að stjórnmálaforingjarnir, eða Evrópusambandið treysti sér í þær.

Tölurnar sem koma frá Grikklandi eru ekki uppörvandi. Í gær birtust tölur um hvernig tekjur Gríska ríkisins hafa skroppið saman, 1. milljarð euroa vantaði upp á áætlanir fyrir janúar. Framleiðsla í landinu dregst saman á ógnarhraða og atvinnuleysi eykst stöðugt. Atvinnuleysi í nóvember var 20.9% en hafði verið 18.2% í október. Atvinnuleysi í nóvember 2010 var 13.9%. Atvinnuleysi ungs fólks var 48% í nóvember. (Byggt á tölum héðan og héðan).

Erlend fyrirtæki geyma helst ekki fé í Grikklandi yfir nótt (það gildir reyndar um fleiri lönd á eurosvæðinu), heldur eru fjármunir umsvifalaust fluttir til Bretlands, Bandaríkjanna eða Þýskalands. (sjá hér)

En þegar tölur yfir atvinnuleysi er skoðaðar er vert að hafa í huga að atvinnuleysisbætur í Grikklandi eru aðeins greiddar í 1. ár. Vaxandi hópur Grikkja hefur fallið út úr almannatryggingakerfinu og á ekki rétt á heilbrigðisþjónustu.

Fyrir 10 árum settu Læknar án landamæra upp starfsstöðvar í Grikklandi til að hjálpa umkomulausum innflytjendum sem streymdu þar inn. Nú segja samtökin að æ fleiri Grikkir leiti til þeirra með grunn heilbrigðisþjónustu. Samtökin hafa nú hafið dreifingu matvæla rétt eins og þau gera í þriðja heims ríkjum. Borgaryfirvöld í Aþenu starfrækja "súpueldhús" við ráðhúsið. Heimilislausum hefur fjölgað um 25% á síðustu 2. árum.

Fyrir stuttu komu Grískir bændur færandi hendi til Aþenu og dreifðu ókeypis á meðal borgarbúa 50 tonnum af kartöflum og lauk. Biðraðirnar leystust upp og til slagsmála kom.  (Hér er byggt á grein í Franska blaðinu Liberation - enska þýðingu má finna hér)

En það er ljóst að euroið hefur ekki tryggt stöðugleika í Grikklandi.  Euroið hefur ekki tryggt kaupmátt Grikkja. Euroið hefur ekki tryggt verðmæti fasteigna í Grikklandi.  En gengi þess hefur auðvitað verið nokkuð stöðugt, sem hefur gert þeim sem eiga umtalsverða fjármuni kleyft að flytja þá óskerta frá Grikklandi. Euroið hefur ekki aukið aga í Grískum efnahag, hvorki í ríkisfjármálum eða kjarasamningum. Grikkland hefur glatað samkeppnishæfni sínu og atvinnuleysi eykst sem aldrei fyrr.

Sameiginlega hafa euroið og efnahagsleg óstjórn komið Grikkjum á vonarvöl.  Hin pólítíska mynt Evrópusambandsins gengur ekki upp samhliða efnahagslegum veruleika Grikkja. 

 

Verkalýðsfélög boða verkföll

Athugasemdir

[Tómas Ibsen Halldórsson, 9.2.2012 kl. 22:29]

Kæri nafni, aðfarir Evrópusambandsins að Grikkjum myndu kallast ofsóknir annarsstaðar en í Evrópu. 

Það er ógeðfellt hvernig komið er fram við almenning í Grikklandi.  Þeir höfðu unnið það sér til sakar að vilja vera eins og aðrir og taka upp evruna. 

Nú lifir fjöldi manna undir fátæktarmörkum, en samt á að halda áfram að lækka tekjur þeirra og skattpína það svo út í hið óendanlega. 

Það er eins og allir séu búnir að gleyma hvað orðið mannúð þýðir.

Þetta er Evrópusambandið sem Samfylkingarfólk í öllum flokkum vill að við Íslendingar göngum inn í.

Ég segi  NEI  TAKK

[G. Tómas Gunnarsson, 10.2.2012 kl. 04:20]

Ástandið í Grikklandi er hriklalegt.  Allar fréttir þaðan bera þess vitni.  Eini Grikkinn sem ég kannast við (sem er reyndar þjónn á kaffihúsi sem ég kem á annað slagið) er með grátstafinn í kverkunum ef hann talar um ástandið "heima".

En auðvitað er öllum ljóst að það verður að grípa til róttækra aðgerða í Grikklandi.  Það er líka öllum ljóst að grípa hefði þurft inn í atburðarásina mikið fyrr.  En Grískir stjórnmálamenn og euroið er hættuleg blanda eins og hefur nú komið í ljós með áþreifanlegum hætti. 

En það getur ekki gengið að skera allt niður, hækka alla skatta og ætlast til að það dugi til.  Það þýðir eingöngu að landið fer tröppu af tröppu niður á við.

Grikkland þarf "Marshall aðstoð" og engum ætti að vera það ljóst betur en Þjóðverjum hverju slíkt getur áorkað.

Enn og aftur er hægt að vitna í Danska forsætiráðherrann, þegar hún sagði að fólk væri tilbúið að færa fórnir, en ekki til að láta fórna sér.

En staðreyndin er sú að þetta er nokkuð nákvæmlega það sem margir spáðu að myndi gerast með euroið.  Ólík lönd, ólíkur efnahagur, einn gjaldmiðill án fjárhagslegs og pólítísks samruna gæti ekki gengið.  Það er mjög ólíklegt að Grikkir hefðu náð að steypa sér í viðlíka skuldir ef þeir hefðu verið með sinn eiginn gjaldmiðil.  Sömuleiðis hefði þeirra eiginn gjaldmiðill verið löngu farin að síga niður á við, eða hafði fallið hefði launakostnaður í landinu aukist jafn mikið og raun ber vitni, umfram kostnaðinn í samkeppnislöndunum.  En ef það eina sem einblínt er á er stöðugur gjaldmiðill..   þá fara aðrir hlutir að gefa eftir.