Samstarfsviljinn?

Nú er rætt nokkuð víða um hverjir muni mynda stjórn að loknum kosningum í vor.  Kaffibandalagið hefur verið nokkuð í umræðunni, enda með meirihluta samkvæmt skoðanakönnunum þessa dagana.

En það eru líka margir sem hugnast ekki um of ríkisstjórn þar sem t.d. Ingibjörg Sólrún væri forsætisráðherra, Össur fjármálaráðherra, Steingrímur J. utanríkisráðherra, Ögmundur dómsmálaráðherra, Guðjón A. sjávarútvegsráðherra og Magnús Hafsteinsson félagsmálaráðherra, svo dæmi sé tekið.

Ég held að fleiri og fleiri séu að komast á þá skoðun að Frjálslyndi flokkurinn sé ekki "stjórnarmateríal", alla vegna ekki að óbreyttu.

En svo koma líka upp í umræðunni vangaveltur um stjórn Samfylkingarinnar og Sjálfstæðisflokks og einnig VG og Sjálfstæðisflokks.  Einhverjar fregnir hafði ég líka af því að völvur væru að spá samstjórn Frjálslyndra og Sjálfstæðisflokks.

Ekki yrði ég hissa á því að fljótlega (ef hann er ekki þegar hafinn) hæfist upp "söngurinn" um svik þessa flokksins eða hins, fyrst hann geti hugsað sér að taka upp samstarf við Sjálfstæðisflokkinn og þar fram eftir götunum.  Svona rétt eins og gekk á milli flokkanna fyrir borgarstjórnarkosningarnar síðastliðið vor.

Það eru margir sem tala niðrandi um það að ganga "óbundnir" til kosninga, að kjósendur eigi rétt á því að vita hvaða flokkar hafi hugsað sér að starfa saman.  Því er ég ekki sammála.

Í fyrsta lagi er erfitt að segja til um hvað kemur upp úr kjörkössunum.  Í annan stað geta samningaviðræður á milli flokkanna verið snúnar og erfiðar.  Það getur því verið verulega hamlandi fyrir flokka í viðræðunum að vera búnir að útiloka einhverja möguleika fyrirfram.  Samningsstaða þeirra er ekki jafn sterk.

Það sást með afgerandi hætti í Kryddsíldinni að Kaffibandalagið er ekki einhuga, samningaviðræður þeirra enda langt frá því til lykta leiddar.  Það er enda eðlilegt, þar sem ekki er ljóst hver styrkleikahlutföllin verða á milli flokkanna, eða hvort þeir ná yfirleitt meirihluta og geti myndað stjórn.

Því er greinin sem eftir Ármann Jakobsson sem birtist á Múrnum vel tímasett og í raun klókt innlegg.  Hún lætur einfaldlega vita af því að Vinstri Græn eigi möguleika til samstarfs án þess að Samfylkingin komi þar nærri.  Lætur vita að VG ætli ekki að láta króa sig af út í horni og geta einungis vænst þess að komast í ríkisstjórn ef Samfylkingin vilji við þau samstarf.

Líklega er það ekki tilviljum að greinin birtist svona stuttu eftir Kryddsíldina.