Íslendingar eru sem sé ekki bara skattsvikarar, þeir eru líka skrýtnir og hörundsárir.

Það er hálf grátbroslegt að lesa þessa frétt.  Líklega hefði mátt bæta við fyrirsögnina.... og margir hverjir athyglisjúkir.  Ekki sé ég tilganginn með lögsókninni, nema ef til vill að hann sé að vekja athygli á fréttinni?  Það gæti auðvitað verið "plottið".

En ef ég verð kallaður fyrir í réttarsalinn, til að kanna sannleiksgildi fréttar Extra blaðsins, þá gæti ég ekki neitað því, að ég væri reiðubúinn til að nýta mér gloppur í skattkerfinu.  Og yrði ég spurður hvort að ég væri reiðubúinn til að leggja undir mig heiminn?  Eiðsvarinn gæti ég ekki sagt annað en að í félagi við góða menn, þá væri ég vissulega reiðubúinn til að leggja mitt á vogarskálarnar.

En þetta eru auðvitað samviskuspurningar sem hver og einn verður að svara fyrir sig.

En svo verður auðvitað að fara að ræða hvað verði gert við þær skaðabætur sem Extra blaðinu verður gert að greiða þjóðinni, eða hvernig eigi að skipta þeim?

Einhverjar hugmyndir?

 

Ekstra-Bladet sakað um kynþáttafordóma gagnvart Íslendingum

Athugasemdir

[Egill Jóhannsson, 30.10.2006 kl. 22:47]

Það er eitt sem gengur ekki upp í færslunni hjá þér. Þú notar orðið Íslendingar í fleirtölu í merkingu allir íslendingar. Aðeins einn Íslendingur hefur kært Extra Bladet og því er bara einn Íslendingur hörundsár.

Í raun held ég að enginn Íslendingur taki mark á þessu. Fyrir því eru margar ástæður en sú helsta er sú að greinin sem birtist í Extra bladed eftir allar upphrópanir helgarinnar frá blaðinu reyndist þegar til kom bara eitthvert rugl án nokkurra sannana eða vísbendinga.

Þetta er eiginlega orðið hjákátlegt og sérstaklega þegar hafðar eru í huga skýrslur aðalhagfræðings Danske Bank sem birtar voru í mars á þessu ári og aftur í haust. Enn hefur ekkert ræst af þeim spám karlangans.

Ég átta mig ekki alveg á þessu og ekki batnaði þetta í morgun þegar blaðið hélt áfram að tala um einhverja lögfræðinga. Hvorugur þeirra er Íslendingur. Báðir danir og mest lítið virðist talað um Íslendinga í greinni í dag.

Vonandi að eitthvað bitastæðara birtist á morgun. Annars verðum við bara fyrir vonbrigðum.

[G. Tómas Gunnarsson, 31.10.2006 kl. 01:40]

Fyrirsögnin er einfaldlega í beinu framhaldi af umfjöllun Extra blaðsins, sem talar um Íslendinga.  Auðvitað má hártoga þetta og sjálfsagt hefði verið réttast að setja "Þjóðarhreyfingarkommu" í setninguna, en það breytir í raun engu.

En auðvitað er eingöngu um prófmál að ræða og þegar það er unnið fer afgangurinn af Íslendingum í mál við Extra.  Einnig ber að líta til þess að ef Extra verður kært fyrir kynþáttahyggju í garð Íslendina eins og kærandi vill (hvernig sem hann hefur komist að þeirri niðurstöðu) þá er auðvitað augljóst að þjóðinni verði dæmdar bætur, eða hvað?

En umframt allt er þó nauðsynlegt að taka þetta ekki of alvarlega, þess vegna fór þetta m.a. í flokkinn "grín og glens".