Sjálfstæðisflokkur hins Sameinaða Konungsdæmis sigrar

Það er orðið ljóst, UKIP, eða Sjálfstæðisflokkur hins Sameinaða Konungdæmis hefur náð sínu fyrsta þingsæti á Breska þinginu.

Þingmaðurinn heitir Douglas Carswell og yfirgaf Breska Íhaldsflokkinn fyrir skömmu og sagði af sér þingmennsku.  Því var efnt til aukakosninga í kjördæminu "Clacton" sem hann sigraði nú fyrir UKIP.

Sigur Carswells var stærri nú, en þegar hann vann sætið fyrir Íhaldsflokkinn í síðustu kosningum.

En það sem vakti ekki síður athygli á Sjálfstæðisflokknum Breska, er hve nálægt hann var að vinna aðrar aukakosningar sem haldnar voru í gær.  

Þar tapaði hann fyrir Verkamannaflokknum, í kjördæmi sem heitir "Heywood and Middleton" og hefur verið sterkt vígi fyrir Verkamannaflokkinn, eða það sem Breskir fjölmiðlar kalla "Labour stronghold".

Þar hlaut UKIP rétt tæp 39% atkvæða, en tapaði með u.þ.b. 600 atkvæðum fyrir Verkamannaflokknum sem var með 40.9%.

Það er því ljóst að þó að UKIP hafi aðeins haft sigur í öðru kjördæminu, þá sækir flokkurinn fast að báðum hinum ríkjandi flokkum í Bretlandi.

Í "Clacton" var Íhaldsflokkurinn með næst flest atkvæði, eða 24%, þá Verkamannaflokkurinn með11 (u.þ.b. helmingi minna en í síðustu kosningum), þá komu Græningjar og loks Frjálslyndir Demókratar, með 1.3%, eða innan við 500 atkvæði.

Það getur breytt miklu fyrir Sjálfstæðisflokkinn í kosningum á næsta ári að hafa þingmann.  Auðveldara verður að telja kjósendum trú á því að hann geti unnið þingsæti, en hefur verið.  Sjálfstæðisflokkurinn sýndi einnig í gær, að hann sækir atkvæði bæði til Íhaldsflokks og Verkamannaflokksins og það er ljóst að landslagið í Breskum stjórnmálum er að taka breytingum, því flokkur Græningja er einnig að sækja í sig veðrið, og sækir að Verkamannaflokknum, en þó sérstaklega Frjálslyndum.

Frjálslyndir virðast eiga það á hættu að þurkast því sem næst út og hljóta ef til vill nokkuð algeng örlög, "stjórnarandstöðuflokka" sem allt í einu komast í stjórn.

En það er ljóst að Sjálfstæðisflokkurinn hefur styrkt stöðu sína svo um munar og tryggt að umræðan um veru Bretlands í Evrópusambandinu verður eitt af stærstu málunum í komandi kosningum.

Hvort Bretland eigi að segja sig úr "Sambandinu" eða ekki, og ef ekki hvaða skilyrði þurfi að setja fyrir aðildinni.

Þingkosningarnar í Bretlandi 2015, verða því að líkum óhemju líflegar og spennandi og eiga eftir að hafa áhrif langt út fyrir Bretland.