Píratar á þing

Þó að niðurstöðurnar í þessari könnun séu all nokkuð frábrugðnar niðurstöðum í könnun Stöðvar2/Fréttablaðsins, eru meginlínurnar ekki ósvipaðar.

Framsóknarflokkurinn er stærsti flokkurinn (og bætir stöðu sína örlítið  frá síðustu MMR könnun), Sjálfstæðisflokkurinn lætur undan síga, Björt Framtíð tapar verulegu fylgi, en Samfylking og VG standa nokkuð í stað.

Stóru tíðindin í þessari könnun er fylgi Pírata upp á 7.8%. Það staðfestir það sem kom fram í Stöðvar2/Fréttablaðskönnuninni að Píratar muni ná á þing.  Þetta er í fyrsta sinn sem þeir ná þeirri stöðu í könnunum MMR og tvöfalda þeir fylgi sitt frá síðustu könnun.

Fylgi Pírata virðist fara upp á við, á svipuðum tíma og fylgi Bjartrar Framtíðar fer niður á við.  Það er að sjálfsögðu freystandi að tengja það saman, sérstaklega þar sem báðir flokkarnir höfða til ungs fólks, en varasamt er þó að fullyrða um það.

Þetta kemur á hárréttum tíma í kosningabaráttunni fyrir þá, og getur fengið kjósendur sem hölluðust að öðrum "smærri" framboðum til að flytja sig yfir á Pírata.  Stemmingin fyrir þeirra framboði virðist fara ört vaxandi. 

Hinn stóri munur á fylgi Framsóknarflokks í þessari könnun og könnun Stöðvar2/Fréttablaðsins hlýtur að vekja nokkra athygli, hann er jú um 10 prósentustig.  Fylgi flestra annara "stærri" flokkanna er að sama skapi hærra í þessari könnun. 

En nú eru rétt rúmar 2. vikur til kosninga - endaspretturinn eftir.  Enn getur flest gerst rétt eins og vaxandi fylgi Pírata sýnir.

Það er næsta ljóst að hart verður sótt að Framsóknarflokknum, þar eru jú atkvæðiin.  En þar getur stemmingin skipt verulegu máli.

Eins og er virðist hún vera með Framsóknarflokknum og Pírötum.  

Hér eru svo niðurstöður könnunar MMR

 

 

Framsókn með 30,2% fylgi

Athugasemdir

[Jósef Smári Ásmundsson, 9.4.2013 kl. 13:34]

Og hvað er þetta:Píratar?

[G. Tómas Gunnarsson, 9.4.2013 kl. 13:47]

Þú verður að drífa þig inn á www.piratar.is og kynna þér málið.  

En Píratar eru hluti af alþjóðlegri hreyfingu.  Ég held að ég fari með rétt mál, þegar ég segi að þeir hafi náð hvað bestum árangri í Þýskalandi og Svíþjóð hingað til.

Fyrirferðarmesti parturinn í málflutningi þeirra snýr að internetinu og tilraunum til að hefta það eða ritskoða. Sem þau eru algerlega andsnúin.

Lang ferskasta "smærra" framboðið að mínu mati.  Hafa það tvímælalaust sem kost að listar þeirra eru ekki fullir af hinum "hefðbundnu kverúlöntum", eða "celebum".

[Jósef Smári Ásmundsson, 9.4.2013 kl. 14:41]

Kannski það Tómas.En ég er nú ekki alveg viss um ef þetta er eina málið sem þeir hafa á stefnuskrá að ég afgreiði þá ekki bara eins og hina flokkana með því að kjósa ekki.Hins vegar tel ég að sömu reglur eigi að gilda um Internetið og aðra miðla.Frjálst meðan það skaðar ekki einstaklinga.

[G. Tómas Gunnarsson, 9.4.2013 kl. 15:06]

Þó að ég segi nú stundum að í mér blundi vel taminn anarkisti, þá á ég ekki von á því að ég kjósi Pírata.

En ég er samt þeirrar skoðunar eins og ég sagði hér að ofan, að þeir séu ferskastir af "smærri" framboðunum.

Þeir eru líka að taka á málum (eins og internetinu) sem aðrir gefa ekki of mikinn gaum og ná til fólk sem hefðbundnir stjórnmálaflokkar eiga erfitt með.

Það að þú skrifir:  ....  um internetið eins og aðra miðla.   Segir að þú ættir að kynna þér málið hjá Pírötunum.   Internetið er nefnilega svo mikið meira en "aðrir miðlar".

Íslendingar þurfa virkilega að fara að huga að framtíðarstefnu í þeim málum, rétt eins og mörgum öðrum.

Þess vegna m.a. held ég að Alþingi geti haft gott af nokkrum Pírötum.

[Tryggvi Helgason, 9.4.2013 kl. 20:55]

Ég hélt nú, satt að segja, að það hafi verið nú þegar margir "ratar" á þingi, - (í rauninni of margir) - og því vart á bætandi að einhverjir - "pí-ratar" - bættust þar við.

[G. Tómas Gunnarsson, 10.4.2013 kl. 04:22]

Of margir ratar, of margir k-ratar.

Pí er auðvitað umtalsvert merkilegra fyrirbrigði en K  :-)

En ég held að öllu gamni slepptu að Píratar séu að leggja áherslu á málaflokka sem vel eru þess virði að gefin sé gaumur á Alþingi.

Þess vegna bæði skil ég og fagna því að þeir séu að ná i gegn af nýju flokkunum.  Þar bera þeir af að mínu mati.