Enn eitt dæmi um offorsið og æsinginn

Því miður hefur það orðið lenska í tíð núverandi ríkisstjórnar að keyra mál áfram af offorsi, ofstopa og æsingi.

Að staldra við og gefa málum tilhlýðilegan tíma og þátttakendum umhugsunarfrest þykir slæm latína. Hvað þá að gaumgæfa málin betur.

Þess vegna hafa verið lögð fram frumvörp á Alþingi sem jafnvel ráðherrar hafa líkt við bílslys.

Því miður gildir það sama um breytingarferli stjórnarskrárinnar.  Þar hefur verið keyrt áfram án þess að horft hafi verið fram á veginn.  Mikinn hluta af því gerrræði má líklega skrifa á þá staðreynd, að "Sambandssinnar" telja núverandi stjórnarskrá hindra inngöngu Íslands í fyrirheitna landið.  Ekkert má standa í vegi fyrir því "masterplani".  Jafnvel stjórnarskránni skal hennt í flýti og flaustri.

En ef líkja má framlagningu eins ókaraðs frumvarps við bílslys, hvaða líkingu ætti þá að grípa til þegar með svipuðum hætti er gengið fram gagnvart sjálfri stjórnarskránni?

Líklega verður að grípa til líkinga á við móðuharðindi.  Móðuharðindi af mannavöldum.

Þess vegna er áríðandi að segja nei við tillögum stjórnlagaráðs.

P.S.  Rakst á ljómandi gott myndband á bloggi Jóns Steinars Ragnarssonar í morgun, leyfi mér að endurbirta það hér.  Þar má sjá Reimar Pétursson setja fram góð rök fyrir því að segja nei í kosningunni um stjórnarskrádrögin.

 

Skiptar skoðanir innan stjórnlagaráðs um frumvarp

Athugasemdir

[Bjarni Gunnlaugur (IP-tala skráð) 17.10.2012 kl. 09:34]

Læt hér sömu athugaemd og ég setti annarsstaðar í gær,er þó sammála því að eflaust má bæta stjórnarskrána, í áföngum:

Ég er farinn að halda að þessi nýja stjórnarskrá sé hrákasmíði liðs sem samanstandi af ESB flugumönnum,hálvitum og nytsömum sakleysingjum hverju innan um annað. Líklega að mestu úr 101 þó ljótt sé kanski að segja það.  Aumt er að sjá yfirklór þess ágæta manns Ómars Ragnarssonar varðandi afnám á takmörkun á kaupum útlendinga.  Eða hvernig umræður um auðlindir landsins eru gjörsamlega úti í móa.   Ég hef fylgst lauslega með umræðum um nýja stjórnarskrá fullkomnlega hlutlaus. En eftir því sem málið er skoðað betur sannfærist maður um að vissast er að svara þessu öllu á einu bretti með góðu og feitu NEI.     Vonandi svo að aulahrollurinn vegna þessa liðs nái að hverfa með tíð og tíma.

Til hvers er annars verið að eyða kröftum og tíma í þessa vitleysu? Af hverju snúast umræður á landinu í dag ekki um hvernig hægt sé  (og hvort eigi) að greiða skuldir landsins og jafna órétti venga vísitölu og gengistryggingar? Ekki hvort heldur hvað eigi að gera?     Af hverju er enginn að stappa stálinu í þjóðina með hvernig hægt sé að spara gjaldeyri og vinna sig út úr vandanum?  Af hverju er Össur ekki búinn að taka pokann sinn eftir að henda milljarði í spilltar ríkisstjórnir sem sár þörf var fyrir t.d. á Landspítalanum? (þe. miljarðinn ekki spilltu ríkisstjórnirnar)  Af hverju í andskotanum er þessari bölvuðu ESB umsókn ekki hent út í hafsauga og farið að vinna í brýnni verkefnum?

Spyr sá er ekki veit!

[G. Tómas Gunnarsson, 17.10.2012 kl. 17:41]

Þakka þér fyrir innleggið Bjarni Gunnlaugur.  Það eru fínar spurningar sem þú berð fram, en ég hygg að við þeim fáist ekki svör, í það minnsta ekki skynsamleg.

Sjálfur hef ég fylgst með þessum umræðum úr fjarska (og sjálfsagt misst af ýmsu), en mér er að öllu hulið hvernig talið er að þessi stjórnarskrárdrög séu bil bóta, eða að þau leysi á einhvern hátt úr vandamálum lýðveldisins Íslands.

En vissulega eru sjónarhólarnir margir og misjöfn frá þeim sýnin.   En ég er þegar búinn að greiða atkvæði og lét mér nægja nei við fyrstu spurningunni.