Getraun dagsins. Hvað eru algengir vextir á húsnæðislánum í Hollandi?

Það hefur mikið verið rætt um vexti og hvað þeir myndu lækka á Íslandi ef Ísland gengi í "Sambandið og tæki upp euro.

En það eru ekki til neinir "Sambandsvextir".

Vextir eru mismunandi í löndum "Sambandsins" sem og á Eurosvæðinu.  Hér er blekkjandi að miða við meðaltal, eða reyna að halda því fram að vextir á Íslandi yrðu eins og í Þýskalandi svo dæmi sé tekið.

Þar með er ekki sagt, að ekki sé líklegt að vextir myndu lækka á Íslandi ef tekinn yrði upp annar gjaldmiðill.  En það er einnig líklegt að sú lækkun yrði ekki eins mikil og oft er látið í veðri vaka. 

Spurning dagsins er því þessi í tveimur liðum:

A) Hver er vaxtaprósenta á húsnæðisláni hjá Hollenska ríkisbankanum ABNAmro.  Svar taki mið af því að lánið sé til 30 ára og lánshlutfall sé á milli 75 og 100%.  Vilji menn frekar miða við lán undir 75% veðhlutfalli, verður það svar tekið gilt, en taka verður fram við hvort er miðað.

B) Hver er verðbólga í Hollandi.

 

Leyfilegt er að nota internetið til að afla sér upplýsinga og skal sérstaklega bent á síðurnar:

https://www.abnamro.nl/en/personal/mortgages/interest-rates/index.html

og

http://epp.eurostat.ec.europa.eu/cache/ITY_PUBLIC/2-24022014-AP/EN/2-24022014-AP-EN.PDF 

 

Athugasemdir

[Erlingur Alfreð Jónsson, 27.2.2014 kl. 14:32]

Langar að benda þér á villu: Það er sama slóð á bakvið báða hlekkina í færslunni. Þú getur svo eytt þessari athugasemd ef það hefur verið leiðrétt. :-)

[G. Tómas Gunnarsson, 27.2.2014 kl. 15:18]

Bestu þakkir fyrir þessa ábendingu Erlingur. Þetta ætti að vera komið í lag núna, ég biðst forláts á þessum mistökum.

[Helgi Jónsson (IP-tala skráð) 27.2.2014 kl. 16:03]

Holland: verðbólga 0.8% og vextir á 75% 20 ára óvertryggðu láni eru 4,75%

Ísland: Verðbólga er 2.5% og vextir á 70% 20ára verðtryggt láni er 4,45% þannig að vextir á Íslenska verðtryggða láninu eru í raun verðbólga + vextir =6,95%

Ps: Vextir á Íslenska láninu eru með þeim fyrirvara að verðbólga haldist lág í alla veganna eina viku en ekki þarf að hafa áhyggjur af slíku með Hollenska lánið þar sem Evran og evrópskt efnahagskerfi er stöðugt.

[Jón Steinar Ragnarsson, 27.2.2014 kl. 16:23]

"...þar sem Evran og evrópskt efnahagskerfi er stöðugt." Frábært að heyra þetta Helgi. Ert þú búinn að búa neðanjarðar s.l. ár?

[G. Tómas Gunnarsson, 27.2.2014 kl. 16:41]

Vissulega eru vextir í Hollandi lægri en á Íslandi, ég held að því neiti enginn. En það er engin trygging fyrir því að vextir á Íslandi verði eins og í Hollandi. Ekki frekar en þeir eru eins í Hollandi og öllum öðrum eurolöndum.

Það er líka rétt að hafa í huga að vegna hinna gríðarlegu efnahagsörðugleika sem Eurosvæðið hefur glímt við, eru vextir þar í sögulegu lágmarki. Seðlabanki Eurosvæðisins reynir enda hvað hann getur til að styrkja hagvöxt og sporna á móti því að komi til verðhjöðnunar.

Á meðan efnahagsörðugleikarnir eru viðvarandi verða vextir lágir, það má telja nokkuð öruggt, að ef svæðið hjarnar við, hækki vextir.

[G. Tómas Gunnarsson, 27.2.2014 kl. 16:59]

Því má svo bæta við, að þó að vissulega sé ekki fyrir því nein trygging, þá eru líkur á því að fasteignaverð haldi í við verðbólgu og oft vel það.

En það er vissulega ekki alltaf raunin. Fasteignaverð í Hollandi hefur t.d. fallið um u.þ.b. 30% að raunvirði síðan að efnahagsörðugleikarnir hófust á Eurosvæðinu. Í mörgum löndum Eurosvæðisins hefur verðfallið jafnvel verið meira.

Það er nefnilega svo, að ef að verðgildi gjaldmiðilsins er nokkuð stöðugt, verða aðrir fastar að taka á sig höggið sem verður þegar efnahagskerfið hikstar.

Fasteignaverð og laun lækka þá gjarna, samfara vaxandi atvinnuleysi.

[ls (IP-tala skráð) 27.2.2014 kl. 18:29]

Sé ekki betur en Arion bjóði 3.5% að 70% veði og 4,5 af því sem er umfram. Lífeyrissjóður Verslunarmanna býður 3,5 - 3,9 en aðeins að 65% veðhlutfalli. (miðast við verðtryggt enda vextir af verðtryggðu yfirleitt lægri)

Á báðum stöðum virðist vera hægt að velja milli jafnra afborgana og jafnra greiðslna.

ls.

[Helgi Jónsson (IP-tala skráð) 28.2.2014 kl. 08:08]

Jón Steinar málefnalegur að venju...

[Guðmundur Ásgeirsson, 28.2.2014 kl. 18:26]

Vextirni sem ls er að benda eru á verðtryggðum lánum og eru þess vegna ekki sambærilegir við vexti á óverðtryggðum lánum sem eru efni færslunnar.

Hægt er að finna upplýsingar um vexti hjá Seðlabanka Íslands. Samkvæmt nýjustu tilkynningu eru þeir nú lægstir 6,75% á óverðtryggðum lánum með breytilega vexti. Það er hjá Landsbankanum og miðast við allt að 70% veðsetningu. Einnig er hægt að taka viðbótarlán upp að 85% veðsetningu á 7,75% vöxtum.

En þar sem verið er að bera saman kjör á milli mismunandi landa í pistlinum hér að ofan, er kannski vert að benda á að á EES-svæðinu er í gildi samræmd aðferð til þess að meta lánskostnað óháð lánsformum eða greiðsluhögun (sem á íslensku verðtryggðum lánunum felur til dæmis sér mikla seinkun á raunverulegri greiðslubyrði). Þessari aðferð er lýst í lögum um neytendalán og felur hún í sér að veita skuli upplýsingar um heildarlánskostnað miðað við forsendur á hverjum tíma, auk árlegrar hlutfallstölu kostnaðar. Yfirlýstur tilgangur þessara reglna er einmitt að gera mismunandi lán samanburðarhæf með samræmdri aðferð.